Ahmetaj flet nga arratia, ndërsa drejtësia hesht?

Prej kohësh, një pjesë e medias shqiptare vazhdon t’i japë hapësirë të konsiderueshme deklaratave të Arben Ahmetajt – një ish-funksionar i lartë i shtetit shqiptar, i cili ndodhet jashtë vendit dhe është shpallur në kërkim ndërkombëtar. Ahmetaj del në media, komenton, akuzon, interpreton dhe “zbulon” mëkatet e të tjerëve.

Por pyetja që duhet bërë është shumë më e thjeshtë: Ku është drejtësia shqiptare? Ku është përgjegjësia institucionale ndaj një personi që nuk ndodhet përballë organeve të drejtësisë shqiptare, por ndërkohë vazhdon të ketë një tribunë publike për të gjykuar të tjerët? Ku janë SPAK-u, Policia e Shtetit, Interpol Tirana dhe institucionet e tjera ligjzbatuese?

A mjafton që një person të jetë jashtë Shqipërisë për të pasur lirinë të bëhet çdo ditë komentator i drejtësisë, politikës dhe korrupsionit të të tjerëve? Dhe këtu lind edhe pyetja më e madhe: A nuk ishte Arben Ahmetaj numri dy i qeverisë shqiptare?

Po. Ai ka mbajtur postin e zv/kryeministrit nga shtatori 2021 deri në korrik 2022, pasi më parë kishte drejtuar disa poste ministrore. Prandaj çështja nuk është thjesht: “Çfarë tha Ahmetaj sot?” Çështja është: Pse një ish-numër dy i qeverisë, i cili është në kërkim ndërkombëtar, vazhdon të trajtohet si një autoritet moral që gjykon të tjerët, ndërkohë që vetë duhet t’u përgjigjet organeve të drejtësisë?

Nëse ka prova për korrupsionin e të tjerëve, le t’i paraqesë aty ku duhet: përpara drejtësisë shqiptare. Nëse ka fakte, ato duhen hetuar. Nëse ka akuza, duhen verifikuar. Por media nuk mund të kthehet në gjykatë dhe një person në kërkim nuk mund të shndërrohet në gjykatës të përditshëm të të tjerëve.

Drejtësia nuk mund të jetë spektakël televiziv. Dhe pyetja që mbetet pezull mbi institucionet shqiptare është e fortë: Si është e mundur që një ish-zv/kryeministër i Shqipërisë të jetë prej vitesh jashtë vendit, ndërsa shqiptarët vazhdojnë ta shohin në ekran duke dhënë leksione për korrupsionin dhe drejtësinë?

Ku është shteti? Ku është drejtësia? Dhe, mbi të gjitha, kur do të përgjigjet vetë Arben Ahmetaj për atë që i atribuohet në dosjet e drejtësisë?