Ergys Agasi, i shpallur në kërkim nga SPAK prej rreth tetë muajsh, është arrestuar në Durrës, në kuadër të hetimeve për dosjen e tenderëve të AKSHI-t. Arrestimi i tij rikthen në vëmendje një prej dosjeve më të përfolura të muajve të fundit dhe marrëdhëniet mes biznesit, institucioneve dhe personave që dalin në materialet hetimore.

Sipas dyshimeve të SPAK-ut, Agasi kishte një rol qendror në koordinimin e një grupi që synonte të ndikonte në procedurat e prokurimeve të AKSHI-t. Në dosje përmenden tenderë të paracaktuar, kritere të përshtatura dhe pagesa që dyshohet se maskoheshin si shërbime.

Një nga elementet më të rëndësishme lidhet me kompaninë EA Solution, në llogaritë e së cilës, sipas materialeve të bëra publike, kanë kaluar miliona euro nga kompani të ndryshme.

Në këtë panoramë shfaqet edhe biznesmeni Ermal Beqiri, i cili përmendet si një nga personat më të afërt me Agasin. Takimet mes tyre janë dokumentuar përmes kamerave të vendosura në zyrën e Agasit dhe, sipas materialeve të hetimit, në bisedat e tyre diskutohen projekte, vlera dhe procedura tenderimi.

Në mënyrë të thjeshtuar, një nga linjat e dyshuara të skemës paraqitet si: Agasi – Beqiri – kompanitë – tenderët e AKSHI-t. Një tjetër emër i rëndësishëm është Mirlinda Karçanaj, ish-drejtoresha e AKSHI-t. Sipas materialeve të hetimit, ajo kishte kontakte me Agasin dhe Beqirin. Karçanaj ka pranuar njohjen me Agasin dhe takimet me të, duke i shpjeguar ato si marrëdhënie private dhe konsulencë. Hetuesit, megjithatë, kanë ngritur dyshime nëse këto kontakte kanë pasur lidhje me procedurat e prokurimit.

Në materialet e publikuara përmenden edhe raste ku vlerat e projekteve dyshohet se janë diskutuar apo ndryshuar në mënyrë të konsiderueshme. Por dosja nuk kufizohet vetëm te këta emra. Në të përmenden edhe Hava Delibashi, Gëzim Hoxha, Andis Papa dhe persona të tjerë, ndërsa disa kompani dalin në procedurat e hetuara. Mes tyre përmendet edhe Communication Progress, për të cilën janë ngritur dyshime lidhur me marrëdhëniet familjare dhe biznesore të personave të përfshirë.

Në këtë histori është përmendur edhe ish-efektivi i policisë Uljan Shpataraku, i cili u arrestua bashkë me Agasin. Emri i tij është lidhur në raportime me ish-drejtorin e Përgjithshëm të Policisë, Ilir Proda. Por kjo nuk do të thotë se Proda është pjesë e dosjes së AKSHI-t. Deri në këtë pikë duhet bërë dallimi mes një lidhjeje personale apo profesionale dhe një përfshirjeje konkrete penale.

Agasi është përmendur ndër vite në raportime si person me kontakte në qarqe politike, por kjo nuk përbën provë se është pjesë e skemës së hetuar nga SPAK-u. Prandaj, edhe këtu duhet ndarë ajo që është fakt i dokumentuar nga ajo që është pretendim politik apo mediatik.

Tashmë, me arrestimin e Agasit, dosja mund të hyjë në një fazë të re. Përpara SPAK-ut është një person që për muaj me radhë ka qenë në kërkim, ndërkohë që hetuesit pretendojnë se kanë mbledhur komunikime, pamje filmike, të dhëna financiare, dokumente kompanish dhe materiale mbi tenderët.

Pyetja që mbetet është nëse dëshmia e tij do të hedhë dritë mbi rolin e personave të tjerë të përfshirë në dosje. Dhe në fund, mbetet edhe një pyetje që vështirë të mos bëhet:

Aq e vështirë është të arrestosh një person që ndodhet në Durrës, si banor, për rreth tetë muaj, në një kohë kur flasim çdo ditë për digitalizimin e qyteteve, teknologjinë, gjurmimin elektronik dhe sistemet inteligjente?