MATILDA KURTI -ARGUMENTI NEWS

Rama zbulon planin e ri: çdo problem i qytetarit do të ndiqet si një pako postare.

Kryeministri Rama sot shpalosi fokusin e ri për ndryshime të rëndësishme në mënyrën e qeverisjes, duke e vendosur qytetarin në qendër të një vizioni që synon të ndryshojë rrënjësisht marrëdhënien me shtetin.

Pogradeci nuk ishte thjesht vendi ku u zhvillua një mbledhje e gjatë qeveritare. Në bregun e Ohrit, mes qetësisë së liqenit dhe diskutimeve që zgjatën me orë, duket se u krijua hapësira për një tjetër mënyrë të menduari: qytetari në qendër dhe shteti në lëvizje drejt tij. Pas një mbledhjeje maratonë, prej afro 6 orësh buzë liqenit të Ohrit, duket se qeverisja po përgatitet të marrë një kthesë të re në mënyrën se si do të trajtojë problemet e qytetarëve.

Mjegulla që shpesh shoqëron burokracinë, pritjen dhe sorollatjen e qytetarëve duket se po zëvendësohet nga një ide më konkrete: çdo problem duhet të ketë një rrugëtim, një përgjegjës dhe një destinacion.

Nëse kjo qasje do të kthehet në praktikë, ndryshimi nuk do të jetë vetëm teknologjik. Ai do të kërkojë një tjetër kulturë qeverisjeje: më pak pritje, më pak sorollatje nga një sportel te tjetri dhe më shumë përgjegjësi për institucionin që merr në dorë një problem.

Ecuria e zhvillimeve gjatë ditës së sotme lë të kuptohet se fokusi i qeverisë po zhvendoset drejt një modeli ku problemi i qytetarit nuk konsiderohet i mbyllur derisa të ketë marrë një përgjigje.

Nga mbledhja buzë Ohrit, mes diskutimeve të gjata për vizionin e ri qeverisës, duket se po kristalizohet një mesazh: qytetari nuk duhet të ndjekë më shtetin; shteti duhet të ndjekë problemin e qytetarit.

Dhe nëse “pakoja” do të mund të gjurmohet realisht nga nisja deri në destinacion, atëherë kjo mund të jetë një nga ndryshimet më interesante të mënyrës së qeverisjes Rama në fazën e re.

Pogradeci, kështu, nuk mund të mbetet jo vetëm si sfondi i një mbledhjeje, por si vendi ku u ndez drita e një vizioni të ri qeverisës. Një vizion që premton të ndryshojë marrëdhënien mes qytetarit dhe shtetit: nga një qytetar që kërkon, pret dhe ndjek zyrat, te një shtet që ndjek problemin e qytetarit deri në zgjidhje. Dhe ndoshta pikërisht këtu qëndron simbolika e Pogradecit: aty ku mjegulla u tërhoq, për t’i lënë vend një ideje plot drite të re për qeverisjen.